Planifikashon
Riba e página aki, bo ta haña e planifikashon mas aktual di e renobashon di Korte di Hustisia. Komunikashon transparente ta hopi importante pa e tim ku ta na kabes di e proyekto. Pa e motibu aki nos ta kompartí e planifikashon di konstrukshon via e wèpsait aki i nos ta aktualisá esaki na momentu ku esaki ta nesesario. Un proyekto di e magnitut aki ta konsistí di diferente fase i ta dependé di diferente faktor. Pa e motibu aki, e planifikashon aki ta eksplísitamente suheto na kambio. Na momentu ku e planifikashon kambia, e kambio lo keda publiká riba e wèpsait di e proyekto.
Resúmen di e planifikashon
- Novèmber 2025: inisio di e trabounan preparatorio.
- Yüli 2026: inisio di e trabounan di demolishon.
- Fin di 2026 – kuminsamentu di 2027: inisio di e trabounan di konstrukshon.
Di akuerdo ku e skema aktual, ta planiá pa finalisá e proyekto pa fin di 2029. Si tin informashon adishonal òf kambionan den e planifikashon, esakinan lo keda publiká riba www.renovatiehofvanjustitie.com.
Na ki momentu e trabounan di demolishon lo kuminsá?
Nos a kuminsá ku e trabounan preparatorio den aña 2025. Durante e fase preparatorio aki, tur adishon ku no ta históriko, ku a keda añadí durante di añanan na e edifisio ta lo keda eliminá. Por pensa, por ehèmpel, na plafònnan suspendé, murayanan divisorio, mashinnan di frialdat bieu, kanalnan di airu i kabelnan ku a bira opsoleto. Tur e elementonan aki ta keda kitá kuidadosamente unu pa unu. E trabounan preparatorio akinan a lo keda finalisá na kuminsamentu di aña 2026.
Na yüli 2026 lo kuminsá e trabounan di demolishon na un eskala mas grandi. Entre otro, lo basha e ala di e edifisio ku a keda konstruí den añanan ochenta, abou. Ta antisipá ku e trabounan aki lo dura aproksimadamente dos luna.
Na ki momentu e trabounan di konstrukshon lo kuminsá?
Un proyekto di e magnitut aki ta konsistí di diferente fase i ta dependé, entre otro, di pèrmitnan, proseduranan di destaho públiko i ehekushon di e trabounan. Pa e motibunan aki e planifikashon ta eksplísitamente suheto na kambio.
E planifikashon di konstrukshon ta dependé di e progreso i e desaroyo di e trabounan di demolishon. Ta antisipá ku e trabounan di konstrukshon lo kuminsá na final di aña 2026. Nos lo kompartí mas informashon tokante esaki na su debido tempu.
Ta premirá ku e trabounan di renobashon i di konstrukshon lo dura aproksimadamente tres aña. Ademas di e renobashon di e edifisio monumental, diferente elementonan nobo lo keda agregá na e diseño pa asina prepará e edifisio pa futuro. Den e komunikadonan di prensa lo por lesa eksaktamente loke ta bai keda agregá. E entrevistanan riba e wèpsait tambe lo duna un bista riba esaki.
Unda mi por bai ku preguntanan tokante e planifikashon?
Un di nos koleganan gustosamente lo asistí bo. Bo por tuma kontakto ku nos via: info@renovatiehofvanjustitie.com.
