Informashon tokante e diseño

Korte Komun di Hustisia lo regresá na su lugá original den Punda, kaminda ku e edifisio históriko, ku a keda konstruí den aña 1860, ta pasando den un proseso di renobashon profundo. E diseño di Korte di Hustisia ta di IMD (ir. Anko van der Woude) i lyongo architecture (ir. Lyongo Juliana). Den e artíkulo aki nos ta duna un splikashon tokante e diseño i tambe algun di e eskohonan ku a keda hasí pa loke ta trata e diseño.

E diseño ta kombiná e patrimonio históriko aki ku konstrukshonnan nobo pa asina yega na un konhunto harmonioso, den kua restourashon kuidadoso ta bai man na man ku e ekspanshon kontemporáneo di e edifisio.

Renobashon di e monumento

E monumento di siglo 19 lo keda restourá kuidadosamente. Lo hiba e edifisio bèk na su kalidat original. Pa motibu di diferente remodelashon den pasado, algun parti di e edifisio a kambia òf a desaparesé. Komo resultado, espasionan original, liñanan di bista i sierto detayenan no ta visibel mas.

Durante e trabounan preparatorio, e karakterístikanan original aki a bira visibel atrobe na diferente lugá. Dor di kita adishonnan ku a keda hasí anteriormente i analisá e struktura eksistente koutelosamente, ta bira posibel pa komprondé e diseño original di e edifisio mas mihó. Esaki ta permití nos restourá komponentenan original kaminda ta posibel. E meta ta pa restourá e monumento di tal manera ku na final esaki ta fásil pa rekonosé atrobe.

E monumento eksistente ta keda e punto di salida di e diseño. Kaminda ta posibel, elementonan históriko lo keda konservá òf lo keda restourá. Di e manera aki, komponentenan ku a pèrdè nan funshon original ta haña un destinashon nobo den e edifisio, manera por ehèmpel, e lokalidatnan ku anteriormente tabata keda usá komo sèl awor lo sirbi komo espasio pa instalashonnan tékniko.

Konstrukshon nobo i espasio públiko

Ademas di renobá e monumento, lo ekspandé e edifisio tambe ku kuater ala nobo na e banda di Waterfort. Despues di un evaluashon kuidadoso, a tuma e desishon pa basha e ekspanshon eksistente, ku a keda añadí for di añanan ochenta, abou. E parti aki tabata den mal estado i no ta kumpli ku e eksigensianan di un edifisio hudisial moderno. Ademas, tin mester di mas espasio pa empleadonan i personal di sosten. E diseño nobo ta hasi posibel pa organisá e funshonnan aki di un manera mas efisiente i mas apropiá, di akuerdo ku e eksigensianan aktual di e sistema hudisial.

E edifisionan nobo ta forma un solo entidat ku e edifisio bieu, pero nan tin un aparensia i uso, distintamente i klaramente moderno. Danki na, entre otro, uso di koló, lo ta fásil pa distinguí esakinan for di e monumento. Bou di e konstrukshon nobo lo krea un paseo habrí i ku hopi sombra.

Tambe lo tin un pasashi públiko ku ta kore bou di henter e kompleho, sirbiendo komo konekshon entre Wilhelminaplein i Waterfort. Di e forma aki, korte ta kontribuí na un espasio públiko mas aksesibel. Pronto lo por kana entre e trapinan konosí komo 21 Trapi na Wilhelminaplein pa yega na e otro banda. Asina ta krea un konekshon nobo entre dos parti di e siudat ku awor ainda ta separá.

Kuater ala

E ekspanshon ta konsistí di kuater ala nobo. Tres di nan a keda diseñá ku un diseño  arkitektóniko similar. Huntu, e alanan blou aki ta forma un grupo ku ta fásil pa rekonosé den hinter e totalidat. Nan lo ta riba e mesun eskala, nan lo tin e mesun bentananan i lo hasi uso di e mesun materialnan di konstrukshon. Esaki ta krea un bista trankil i harmonioso na e banda di Waterfort.

E di kuater ala tambe ta parti di e konstrukshon nobo, pero lo e tin un karakter mas suave. A diseñá esaki usando otro tipo di material pa ku e por konektá mihó ku e aparensia di e kaya. Den e edifisio aki lo tin e nivel di seguridat mas haltu, ku un entrada separá pa personal di seguridat i pa detenidonan.

Durabilidat tabata un parti integral di e diseño for di kuminsamentu. E edifisio ta usa ménos energia pasobra a diseñá esaki di tal manera ku e ta keda mas fresku den nos klima tropikal.

Fachadanan i e daknan lo keda bon isolá. Ademas, e sistemanan kontra solo na e bentananan ta sigurá ku lus di solo direkto ta keda redusí di un manera signifikante. Esaki ta buta ku lus direkto di solo lo por drenta solamente durante di aproksimadamente dos ora pa dia, kual ta redusí e nesesidat di aire kondishoná konsiderablemente.

Tambe lo fangu e awa di áwaseru i usa esaki. Huntu ku e awa proveniente di e sistemanan di aire kondishoná, e awa di áwaseru lo keda kolektá den reservanan supteráneo. E awa aki lo keda usá pa muha e matanan rondó di e edifisio.

Riba e dak lo instalá pènelnan solar, esakinan lo hasi posibel pa e edifisio generá un parti di su propio energia.

Diseño i organisashon interno

E edifisio di Korte di Hustisia renobá ta konsistí di e monumento históriko i kuater edifisio nobo. Huntu nan ta forma un solo kompleho.

Den e edifisio tin hopi atenshon pa un klima interno agradabel i salú. Kaminda ta posibel, lo hasi uso di ventilashon natural, lo tin sufisiente lus di dia i lo hasi uso di materialnan ku ta usa poko energia i ku ta duradero.

E eksperensia di e usuarionan ta tambe un aspekto importante. E rutanan den e edifisio ta kla i ta separá. Tin ruta separá pa: bishitantenan, empleadonan, huesnan i detenidonan. E rutanan a keda diseñá di tal manera ku e edifisio ta keda sigur, trankil i bon organisá. Bishitantenan lo drenta via di un área klaramente señalá komo entrada, for di unda nan lo keda guiá pa yega na e empleadonan públiko i e salanan di korte. Alabes, e sirkulashon interno ta organisá di un manera lógiko rondó di e diferente funshonnan den e edifisio.

A kontinuashon ta sigui un splikashon kòrtiku di e diferente partinan di e kompleho:

E edifisio históriko ta keda e kurason di e kompleho i lo keda restourá kuidadosamente. Den e edifisio aki lo tin prinsipalmente espasio pa e hurisdikshon sivil i diferente personal ku funshonnan di sosten. E kuater edifisionan nobo ta agregá mas espasio i funshonalidat na e kompleho i ta organisá di e siguiente manera:

• Piso abou: Na e piso abou lo tin e pasashi públiko, kaminda tambe lo tin, un balinan di informashon, salanan di espera i diferente otro lokètnan, manera lokèt pa hasi petishon di dokumentashon. Na e piso aki lo tin e entrada prinsipal, resepshon sentral, e salanan di espera i otro empleadonan ku funshonnan públiko.
• Promé piso: E salanan di korte ta situá prinsipalmente na e promé piso. E detenidonan ta yega e salanan di korte via un trapi i left separá. Bishitantenan lo drenta via Wilhelminaplein, pasa kontrol di seguridat i sigui un ruta kla indiká pa yega na e salanan di korte. En total lo realisá shete sala di korte: dos pa kasonan penal i sinku pa kasonan sivil. E salanan pa kasonan sivil ta lokalisá pa gran parti den e monumento eksistente, miéntras ku e salanan pa kasonan penal ta situá den e edifisio nobo ku tin e nivel di seguridat mas haltu.
• Di dos i di tres piso: E pisonan ariba ta diseñá komo espasionan di trabou i ofisina pa empleadonan. E pisonan aki ta ofresé espasionan di trabou fleksibel, espasionan pa reuní i espasio pa diferente empleadonan ku funshonnan di sosten. E di tres piso di e sekshon sentral tambe ta akapará un fasilidat pa uso general ku ta konta ku un kafetaria i un área pafó ku bista riba e siudat i laman. Na e di tres piso di e parti sentral di e kompleho lo tin tambe un fasilidat komun ku un kafeteria i un espasio habrí ku bista riba siudat i riba laman.
• Ala di seguridat haltu: E di kuater sekshon di e edifisio tin un karakter diferente for di henter e kompleho i a keda diseñá spesífikamente pa funshonnan ku ta rekerí un nivel di seguridat mas haltu. Den e ala aki, entre otro, lo tin e entradanan pa detenidonan, e salanan den kual ta trata kasonan penal i e fasilidat pa transporte sigur di detenidonan. E diseño ta funshonal i espesialmente adaptá na e eksigensianan spesífiko di e tipo di funshonnan aki.

Planifikashon

Preparashonnan pa realisashon di e proyekto a kuminsá den aña 2025.

Segun e planifikashon aktual, renobashon di e monumento i konstrukshon di e edifisionan nobo lo kuminsá na yüli di 2026.

E trabounan lo keda ehekutá den diferente fase. Durante henter e proseso i progreso di e proyekto lo sigui komuniká i spliká pa medio di komunikashon adishonal i entrevistanan ku e personanan involukrá.