Informashon di e edifisio

Den kurason di Willemstad tin un edifisio ku ta respirá historia ya pa mas ku un siglo i mei: Korte Komun di Hustisia. E edifisio ikóniko ta na Punda, anto e ta na bispu di un gran transformashon. Den e kuadro akí ta importante pa anotá i warda su historia bon. E edifisio su historia den poko frase…

Na siglo 19 a konstruí e edifisio komo e promé edifisio pafó di e murayanan di sentro di siudat. Esaki tabata un eskoho progresivo pa e tempunan ei. Ku e paso akí e siudat a ekspandé, anto e proyekto akí a nifiká un promé paso den desaroyo di e área pafó di e núkleo históriko di Punda.

Konstrukshon i uso

Entre 1857 i 1859 a konstruí Korte Komun di Hustisia, anto a terminá e edifisio for di 1860. Originalmente a usa e edifisio komo stathùis, pero e isla tabatin mester di un lugá sentral pa hurisdikshon. E edifisio akí tabata ofresé e espasio i un aparesia mehestuoso ku tabata pas ku loke tabatin mester.

A konfia diseño di e edifisio na teniente-ingeniero W. Schut di e departamento di ingenieria. Schut a opta pa un estilo neoklásiko ku un fachada imposante i simétriko, ku diferente paviyon. Pa e konstrukshon a hasi uso di material lokal manera pieda di koral, kombiná ku klenku i elemento di palu. E edifisio a haña tres piso i un wòldak sólido ku panchi di dak. No únikamente e kostrukshon tabata estétikamente atraktivo, pero tambe e tabata ofresé protekshon kontra e solo kayente i wer di awa trópiko.

Anteriormente Korte Komun di Hustisia na Sürnam tabata fungi komo kolegio di apelashon pa Kòrsou, pero ku apertura di e tribunal nobo, e isla a haña un struktura hurídiko independiente. Konsekuentemente huridikshon a bira mas aksesibel i por a traha na e kasonan lokal di manera mas efisiente. Ku presensia di Korte Komun di Hustisia, Punda a krese bira un sentro atministrativo na Willemstad, ku diferente edifisio gubernamental pegá serka di otro.

Na aña 1997 a asigná Korte Komun di Hustisia ofisialmente komo monumento protegí. Esaki a sosodé den kuadro di rekonosementu di Willemstad komo patrimonio mundial di UNESCO. E edifisio a haña un estado di protekshon pa motibu di su balor históriko i arkitektóniko. Esaki ta nifiká ku mester ehekutá renovashon i adaptashon kuidadosamente, pa asina mantené e patrimonio. Komo un di e edifisionan di mas ikóniko di Kòrsou, Korte ta hunga un papel importante den historia di sentro di siudat i di e isla.

Renovashon i futuro

Den transkurso di aña e edifisio a pasa dor di diferente renovashon pa por keda kumpli ku e eksigensianan funshonal. Sinembargo den transkurso di tempu, problema ku entre otro èrko i kriamentu di beskèin a surgi. Tur esaki a kousa un bahada den funshonamentu di e edifisio. Esaki a kousa ku na 2020 Korte Komun di Hustisia a muda bai un edifisio mas modèrnu na Emancipatie Boulevard Dominico F. ‘Don’ Martina 18. Esaki ta keda pafó di e sentro históriko di Willemstad.

Awor, mas ku 160 aña despues, Korte Komun di Hustisia ta kuminsá ku un kapítulo nobo. Un kapítulo den kua pasado ta wòrdu tesorá, miéntras e edifisio ta wòrdu prepará pa futuro. Despues di e renovashon Korte Komun di Hustisia lo muda bai e edifisio monumental bèk.