Awor ku e trabounan di demolishon na Korte di Hustisia lo kuminsá pronto, pa promé biaha ta kompartí imagen di e diseño nobo. Ku e renobashon i ekspanshon di e kompleho monumental, Korte no solamente ta drenta un futuro duradero, sino tambe lo haña un edifisio habrí i aksesibel ku ta kumpli ku e nesesidatnan modèrnu.

E arkitektonan Anko van der Woude (IMD) i Lyongo Juliana (Lyongo Architecture) a krea un diseño ku ta konsistí di kuater ala ku koutelosamente ta integrá den e edifisio monumental. E parti históriko di Korte ta keda mantené, meskos ku e elementonan karakterístiko ku ta duna e edifisio su balor kultural-históriko.

Alabes e ekspanshonnan ku a tuma lugá den añanan 80 no ta kumpli mas ku e nesesidatnan di un organisashon di hustisia modèrnu. P’esei ta remplasá e partinan aki ku un espasio nobo, amplio i duradero, den kua lo tin un kantidat di ofisinanan i salanan di reunion flèksibel.

Konekshon habrí entre sentro di siudat i waf

Un elemento importante di e diseño ta e echo ku lo hasi nos sentro di siudat mas aksesibel, manera Anko van der Woude ta splika. “Pa e entrevista aki nos ta pará na Waterfortstraat, tras di e monumento. E edifisio banda di nos ta di aña 1985, pues bo no por konsider’é un edifisio históriko. Despues di a studia e situashon detayadamente, nos a disidí pa basha henter e edifisio abou. Esaki tin di aber ku e tamaño ku e a wòrdu konstruí den su tempu. E funshonnan di Korte no ta pas mas den e edifisio aki. Aworaki ainda tin hopi tráfiko di outo na Waterfortstraat, pero e intenshon ta pa trese kambio den e área, kaminda hende por kana i keiru.”
Bou di e alanan nobo lo bini un alameda ku ta duna sombra. Banda di esey, bou di henter e kompleho, lo tin un pasashi públiko ku ta konektá Wilhelminaplein ku e área di Waterfort. Na banda di Waterfortstraat lo agregá lugánan pa sinta tambe. Asina lo krea un área ameno kaminda hende por bin huntu i kompartí ku otro. Huntu, e rutanan aki ta fortalesé e konekshon entre Wilhelminaplein, e waf i sentro di siudat, dunando e área un karakter mas ameno i aksesibel.

Seguridat i fasilidat pa uso ta pará sentral

Den e alanan nobo lo tin mas espasio pa esnan ku ta traha na Korte, inkluso diferente lugá pa traha i salanan di reunion modèrnu. Banda di esei, pa e trahadónan lo bini un kantina sentral.
E sala di korte monumental ta wòrdu drechá i lo bini shete sala di korte den e kompleho nobo. Seguridat, aksesibilidat i fasilidat pa uso ta forma e puntonan di salida importante pa e diseño. Trahadónan, bishitantenan i detenidonan, kada un lo tin nan propio ruta den e edifisio. Di e manera aki ta separá e fluho públiko for di e área sigurá. E edifisio hudisial ta wòrdu ekipá segun normanan modèrnu den área di seguridat, aksesibilidat i fasilidat pa uso.

Arkitekto Lyongo Juliana ta di akuerdo ku esaki: “Loke ta importante den korte ta ku e hendenan ku ta traha ei no tin mester wòrdu preokupá pa nan seguridat. P’esei nos a tuma diferente medida. Por ehèmpel, un di e alanan a wòrdu diseñá i ekipá ku seguridat ekstra. E edifisio mester duna sufisiente seguridat sin ku e bira manera un bùnker. Korte mester keda parti di nos siudat. Hustisia ta un parti esensial di nos komunidat, p’esei e ta den kurason di nos sentro di siudat.”