E trabounan preparativo di e renovashon di e Korte di Hustisia monumental na Punda ta andando. E arkitektonan Anko van der Woude i Lyongo Juliana ta konta tokante e diseño den un vidio di mas o ménos 4 minüt. A filma e vidio na e sitio di e rekonstrukshon. Den e vidio nan ta konta tokante e restorashon, e intervenshonnan ku lo wòrdu hasí, anto loke esaki ke men pa Korte, pa Willemstad i pa Kòrsou.

IMD (ingeniero Anko van der Woude) i lyongo architecture (ingeniero Lyongo Juliana) a diseñá e renovashon riba enkargo di e ministerionan Verkeer, Vervoer en Ruimtelijke Planning (VVRP), Finansas i Hustisia. E diseño ta kombiná respèt pa e karakter monumental di e antiguo Statèis, ku un vishon dirigí riba futuro, den kua e edifisio ta wòrdu transformá te un lugá di trabou pa hustisia ku lo ta modèrnu, sigur i duradero.

Patrimonio ku ta konta historia

Korte di Hustisia ta data di e periodo 1860-1865 i tabata e promé edifisio grandi ku a wòrdu konstruí pafó di e murayanan di Punda. Debí na falta di mantenshon, e edifisio tin mester di un renovashon na gran eskala. Arkitekto Anko van der Woude ta konta tokante e trabounan ku ta wòrdu hasí.

“Aworó parti pafó dje edifisio lo ta kompletamente den stengel, ya komo lo renová i restorá esaki kompletamente,” e ta konta den e vidio. Den esaki no ta tene kuenta únikamente ku drechamentu, pero tambe ku e manera kon e edifisio ta funshoná den e sentro di siudat.

Arkitekto Lyongo Juliana tambe ta enfatisá e importansha di mantenshon di e monumento. “Nos edifisionan i monumentonan ta konta ken nos ta. No únikamente nan diseño, pero tambe tur loke a pasa aki,” e ta bisa. “Manteniendo e patrimonio akí, nos por sigui pasa e historia di nos pais di generashon pa generashon.”

Restorashon ku respèt

E renovashon ta dirigí riba restablesimentu di e balor monumental di e edifisio, ku atenshon spesial pa e diferente fasenan di restorashon ku e edifisio a pasa aden den transkurso di tempu. Lo renová i kaminda tin mester lo drecha e fachada di e edifisio kompletamente. Lo mantené e elementonan karakterístiko, manera e koló oker di e fachada i e piedanan di koral visibel den e piso mas abou. “Lo bo por skohe pa pone tur kos bèk den e estado di un siglo i mei pasá,” Van de Woude ta kontinuá. “Pero nos ta laga mira tambe loke generashonnan promé ku nos a agregá. E piedanan di koral akí tabatin un funshon i ademas nan ta duna e edifisio su karakter.”

Banda di esei ta adaptá e edifisio na e eksigensianan di awendia, manera entre otro den e área di dominio di klima i siguridat. Alabes e aparensia ta keda habrí i ta hasi bo sinti bo bonbiní ya komo e bentananan lo mustra manera nan ta habrí. Despues di hopi aña di preparashon, a kuminsá ku e renovashon. “Nos ta enormemente kontentu ku nos a yega na e fase akí den kua e diseño ta bai bira realidat” Juliana ta konta “Pa loke ta trata e koperashon: ta mashá spesial ku dos arkitekto ta traha huntu na ún proyekto. Entretantu nos tin dos aña ta traha amenamente huntu. Tin respèt mutuo, nos ta krea algu huntu i den esaki kada un nos perisia ta wòrdu apresiá. Nos tin e mésun meta: ku e renovashon akí nos ta duna un kontribushon signifikativo na e sentro di siudat. Ya pa 30 aña ta enfatisá ku Punda mester haña un bida nobo, anto mi ta konvensí ku esaki ta un paso masha importante den e proseso ei.”

Sigui e proyekto

E entrevista aki a wòrdu kondusí pa N.A. Ontwerpstudio na desèmber 2025. E entrevistanan ku e arkitektonan ta forma parti di un serie di kòmbersashon ku ta wòrdu tené na e lugá di e rekonstrukshon, den kua e tema i progreso di e renovashon ta wòrdu spliká. Kada entrevista ta enfoká riba un otro aspekto di e proyekto i ta mustra kon patrimonio, arkitektura i desaroyo urbano ta bini huntu. Den transkurso di aña lo publiká diferente entrevista.

Por haña tur informashon tokante e renovashon riba bos wèpsait. Banda di esei por sigui e proyekto via LinkedIn i Facebook, kaminda lo kompartí desaroyo, entrevista i  historianan di fondo.