Un bon diseño ta kuminsá ora bo komprondé e ambiente den kua e edifisio ta pará, kiko e ròl di e edifisio ta kaminda e ta, anto kon hende ta move rondó di dje.  Pa renovashon di Korte di Hustisia Komun IMD i lyongo architecture a hasi un estudio di planifikashon urbano. E pregunta sentral durante esaki tabata: kon nos por konektá e edifisio bèk ku e sentro di siudat?

Korte di Hustisia (ku ta marká ku hel) ta bai su lokashon original bèk: un edifisio monumental ku ta data di 1860, lo wòrdu renová profundamente. E renovashon ku ta tuma lugá na enkargo di e ministerionan di VVRP, Finansas i Hustisia, ta dirigí riba mehora di e aksesibilidat i mehorá di e balor di patrimonio na e lokashon. Pa por realisá esaki a hasi un kantidat di estudio na e diseño.

Análisis di e rutanan di tráfiko

Un estudio importante tabata pa haña un bista riba e aksesibilidat di e lokashon. Ta kon e empleadonan i bishitantenan ta yega korte aworó? Anto ta kua ta e servisionan ku tin, anto por yega nan na pia? E análisis di e asina yamá ‘loopstralen’ ta konsentrá riba distansha ku por kana den 5 te 8 minüt. Ta fásil pa yega e lokalidat na pia, pero tambe ta wak kon aksesibel e ta ku transporte públiko i ku outo. Un bon aksesibilidat ta un eksigensia di e programa pa edifisionan di korte manera e ta registrá den e dokumento ‘Functionele Eisen Gerechtsgebouwen’ (Eksigensia Funshonal di Edifisionan di Korte).

Asina ta sali na kla ku en prinsipio ta posibel pa parker outo na Wilhelminaplein, direktamente dilanti di e entrada. Si no tin lugá ei, e ora ei tin mas alternativa den e área serkano. E lugá di parker na Waaigat ta keda na un distansia di 6 pa 7 minüt kana.  E parada di bùs di Otrobanda ta keda na un distansia similar. Anto e stashon di bùs di Punda ta keda ainda mas serka: na un distansia di 5 minüt na pia.

Pafó, rondó di e edifisio, nos ke krea diferente lugá bèrdè kaminda un pasante por sinta, relahá i gosa di e sentro di siudat. Vegetashon rondó di e rutanan urbano ta yuda pa baha e temperatura den e área. Pero área bèrdè ta hasi mas ku únikamente freska. Otro efekto ta ku e ta fortalesé e konekshonnan sosial. Investigashon ta demostrá ku den área bèrdè hende ta sinti nan mes mas seif, nan tin mas kontakto sosial i asta nan ta sinti nan mes mas felis. P’esei huntu ku gobièrnu, nos lo wak kiko e posibilidatnan ta.

Traha ruta i lugá di enkuentro nobo

Ora bo sa kon hende ta move den sentro di siudat, e ora ei tambe bo sa unda por krea ruta nobo. Un elemento nobo i remarkabel ta bira e posibilidat pa kana ‘bou di e edifisio’. E entrada aktual di Parlamento, ta bira parti di e ruta públiko kaminda por kana entre Wilhelminaplein i Waterfort. E plasa i e fòrti lo wòrdu komuniká ku otro. Di e manera akí ta krea un pasahe públiko ku ta pasa bou di e edifisio. Esaki ta habri e pasahe pa peatonnan i ta fortalesé e relashon ku e sentro di siudat.

Promenade kantu di Waterfort

Lo akomodá e ofisinanan i lugánan di trabou den e área nobo. E diseño di e konstrukshon nobo ta konektá bon ku e karakter históriko di Korte. Méskos ku e área ku ta rondon’é: por rekonosé e arkonan di Waterfort den e diseño nobo. Bou di e konstrukshon nobo tin un pasahe habrí. Hasiendo esaki nos ke habri e kaya pa paseante, anto krea un alameda aksesibel.

E rutanan nobo ta konektá ku e rutanan eksistente kaminda hende ta kana rondó di Korte i ta forma un konekshon den e ret urbano mas grandi. Di e manera akí ta krea konekshon ku otro desaroyo na gran eskala manera e kompleho di Plaza, anto alameda eksistente manera esun di Pietermaai. Di e manera akí Korte atrobe lo ta un parti aktivo di sentro di siudat, reintegrá i uní.